يابـنـت يـالـلـي تلبـسـيـن الفـرنـسـي وتمسسيـنـه فـــوق الارداف مـسّــا
حمستـي قلـوب المساكيـن حمـسـي واللي يشوفك طـال ليلـه ولا امسـا
الـنـاس تـرهـا يــا البـنـيـه تـحـسّـي لاتحسبـيـن ان الـعـرب مــا تـحـسّـا
وانتـي عرضتـي والبضاعـه تعسّـي واللـي يطـب الـسـوق مثـلـك يعـسّـا
ابـديـتـي الـلــي كـــان لازم يـدسّــي اللـي عــن عـيـون الخـلايـق يـدسّـا
واليـوم قدمتـيـه فــي وســط تبـسـي وقلتـي لجمـهـور الجويعـيـن كبـسـا
ليـن اجتمـع وايـل وهيثـم وعبـسـي مثل البساس اليا اروحت ريح بسّـا
وجيهـهـم مـثـل الـمـرايـات مـلـسـي وعـيـون مــرطٍ والمنـاخـيـر فـنـسـا
لامـا التفـت كـنـه مجـبّـس بجبـسـي خايـف علـى الغتـره تعطّـف وتقسـا
كـنـه مـربّـط فــوق علـبـاه حـلـسـي ودك تسـوقـه بـيـن الاسـنـان بقـسـا
بنت الرجال اللي على الخيل ترسي اللـي وراهـم يشـبـع الـذيـب فـرسـا
قامـت تغنّـج بـيـن كـدلـك وجمـسـي واحمـس قلبـي مـن فعايلـك حمـسـا
شومي عن اهل الدندنه والمجسـي اللـي ليـا ذكـروا هـل الطيـب يخسـا
ذولاك مــا يـسـوون يابـنـت فلـسـي لـو جتهـم الهيئـه يـروحـون دعـسـا
نسيتي ان اللـي خلـق جـن وانسـي يمـهـل ولا يهـمـل ولا هــوب ينـسـا
قادر على انه يحبس الروح حبسي فـي ساعـةٍ كــل المخالـيـق خـرسـا
ارخـي العبايـه خلّـي العـود مكسـي حتـى يجـي عنـدك عريـسٍ وعرسـا
تبنيـن جيـلٍ يغـرس الطيـب غرسـي جيـلٍ خـذا فـي سلـم الاجـواد درسـا